دولار اليوم
كتب حسين بزي
شو سبب ارتفاع الدولار بشكل مفاجئ؟
مبارح عدة مصارف أعلنت تخفيض كوتا الدولار اليومية المسموح سحبها والبعض قرأ بالقرار بداية تضييق تمهيداً لإيقاف التعميم 161 نهاية آذار الحالي، بعد هالقرار بدأ ارتفاع سعر الصرف بالسوق السوداء وأقفل ليل أمس على 21200.
شو صار اليوم الصبح؟
تفاجأ عدد من الأفراد والشركات بعدم فتح منصة صيرفة بـ Bloom Bank وSGBL وهني المصرفان الأكثر تطبيقا للتعميم 161 وهني المصرفان الأكثر قُرباً من حاكم مصرف لبنان رياض سلامة واليوم تحديداً ما سلّموا دولار دون معرفة الأسباب وفوراً طار الدولار ولامس الـ24,000،
هل رح يستمر بالإرتفاع؟
منطقياً رقم 24,000 رقم منفوخ جداً ووهمي وربما أراد الحاكم تذكير المعنيين بلحظة اشتباك سياسي مُعيّنة ووصول الموازنة إلى لجنة المال وبداية مناقشتها إضافة لمعركة الميغاسنتر المستجدة إنو بلحظة بس يشيل ايده بحلّق الدولار من جديد ومنذ بعض الوقت سرّب المصرف لموقع “النهار” إنو صيرفة مُستمرة وفوراً رجع هبط للـ 22700.
شو رح يصير بكرا؟
بكرا إذا عاودت المصارف ضخ الدولار كالمُعتاد رح يرجع يستقر بحدود 21500 وربما أقل خاصة إنو رسالة رياض وصلت وفش داعي يستمر باللعب أما في حال استمرت المصارف لليوم الثاني بعدم الضخ فهذا يعني رح نرجع نشوف رقم 24 اللي شفناه اليوم
هل السوق فلت؟
لا السوق بعد ما فلت والتعميم 161 مُستمر، أقله لآخر آذار ورياض عنده قدرة عالتدخل لكن مش لوقت كتير لكن اذا حس انو الموازنة رح تطول مناقشتها بالمجلس النيابي رح ياخد قرار هو ورئيس الحكومة “عليي وعلى أعدائي” ولما يتم الإعلان عن تجميد مفاعيل التعميم 161 ساعتها ما حدا رح يلحق الإرتفاعات المجنونة